Oʻzbekiston Respublikasi Prezidenti Shavkat Mirziyoyev Hindiston Respublikasi Bosh vaziri Narendra Modining taklifiga binoan 2019-yilning 17-yanvar kuni amaliy tashrif bilan Hindistonning Ahmadobod shahriga keldi.
Ahmadobod xalqaro aeroportida oliy martabali mehmonni Hindiston Respublikasi rasmiy doiralari vakillari kutib oldi.
Davlatimiz rahbari 18 yanvar kuni Gujarat shtati markazi Gandinagar shahrida oʻtadigan “Joʻshqin Gujarat – 2019” IX xalqaro investitsiya sammitida ishtirok etadi.
Avval xabar qilinganidek, Prezidentimiz sammit yalpi sessiyasida nutq soʻzlaydi. Shuningdek, Bosh vazir Narendra Modi bilan Oʻzbekiston – Hindiston hamkorligi, xalqaro va mintaqaviy siyosatga doir dolzarb masalalar yuzasidan muzokaralar oʻtkazadi.
Bosh vazir Narendra Modi tashabbusi bilan Gandinagar shahrida 2003 yildan buyon oʻtkazib kelinayotgan “Joʻshqin Gujarat” sammiti mintaqadagi eng yirik xalqaro forum hisoblanadi. Unda davlat va hukumat rahbarlari, vazirlar, xalqaro tashkilot va transmilliy korporatsiyalar rahbarlari, yetakchi tahlilchilar, ekspertlar qatnashadi.
Prezident Shavkat Mirziyoyev “Joʻshqin Gujarat – 2019” xalqaro investitsiya sammitida Markaziy Osiyo mamlakatlaridan asosiy mehmon, shuningdek, Hindiston hamkori sifatida ishtirok etadi.
Anʼanaga koʻra, global iqtisodiyotni rivojlantirish, savdo sohasidagi sheriklikni kengaytirish, investitsiyalar jalb qilish, ilgʻor texnologiyalar va bilimlar almashishga doir dolzarb masalalar forum ishtirokchilari diqqat markazida boʻladi.
